Everything has a beginning ….. has an end
當初做緊呢份工諗住係兼職，無人，包括我自己諗過會做到十一年，何況呢度？斷估最少可以寫到 #10，如無意外主要都係短評，敬請拭目以待。
今次介紹嘅餐廳係基於一個誤會，話說有次食飯泊低咗架車喺順寧道附近(深水埗松記後兩條街)，行行下見到有間Cafe，嘗試從Openrice搵下個名，以為係嗰間，前幾晚跟Openrice地址去到先發現個地址原來係另一間黎，即係今次介紹呢間 – CHOO CHOO。
軟殼蟹羅勒葉墨汁意粉 – 軟殼蟹唔太油相當脆口，意粉係辣的，微辣以上，剛剛好。
牛肩胛 – 話說落Order時候無問過要幾多成熟，但出黎效果啱啱好。牛肩胛面頭鋪滿遠望類似爆谷，其實係牛油黎，邊食邊溶到牛肩胛面，味道到賣相都係一等一。
Gold Rush – 甜品組合，主食係三條榛子芭菲，甜度剛好。
Choo Choo人均消費約為$200，同區應該算偏貴，但論餐廳裝修，食物賣相同水準，絕對係合理價錢。講起裝修，我有同餐廳反映過「呢度啲嘢食幾得喎，不過整整度門先」，無錯，因為入去用咗唔少時候研究度門點開，無手柄又無Instruction，佢地話：「因為Designer唔想破壞度門嘅美感」。Well，講法上我係好Buy的，不過都係User friendly啲好。加多句，其實間餐廳得四五張檯，要食最好訂位先。
Choo Choo
地址: 長沙灣順寧道364-368號昌暉大廈地下1號舖
電話: 3707 1034
Openrice / Facebook
泊車: 夠薑可以泊街，唔夠薑最近可以泊麗寶花園，過一條馬路就到。
地鐵: 長沙灣站15分鐘應該行到過去